ஆயா!

                    (எடுத்துக்காட்டு படம்)

                              ஆயா!
                               ~~~~~
   அறைக்குள் வேகமாக நுழைந்த அவசரப் பிரிவு வார்டு பாய் சேகரைப் பார்த்த கண்மணி "என்ன?" என்றதும்
"சிஸ்டர், நெரைய காயத்தோட ஒரு பேழன்ட்... ட்யூட்டீ டாக்டர் உங்கள உடனே கூப்பிடறார்" என்றார் வார்டு பாய்.

   உள் நோயாளிகளுக்காக மருந்துகளை அடுக்கிக் கொண்டிருந்த கண்மணி "தோ வரேன் பா" என்றபடி " ஏ.. ஸ்பின்ஸீ.. முன்னாடி போய்வரேன், கொஞ்சம் யாரும் கை வைக்காமல் பார்த்துக்கோ...
ஏன் இன்னைக்கு காவேரி லீவா " என்று அப்போதுதான் அறைக்குள் வந்த பிரபாவிடம் கேட்க "தெரியலையே அக்கா, நீங்க போய்வாங்க நான் பார்த்துகிறேன் " என்றாள் புன்னகையோடு. தன்னை ஆயா எனக் கூப்பிடாமல் செல்லப் பெயரிட்டு நர்ஸ் கண்மணி அப்படி கூப்பிட்டது அவளுக்கு சிரிப்பை வரவழைத்தது. 'அதென்ன ஆணை மட்டும் எத்தனை வயதானாலும் வார்டு பாய் என்பது பெண்ணென்றால் மட்டும் ஆயா என்பது' என்ற தனது பழைய சந்தேகத்தை மீண்டும் ஒருமுறை தனக்குள் கேட்டுக் கொண்டே
உள்நோயாளிகளுக்குத் தரவேண்டிய உணவுகளை எடுத்து தள்ளிச் செல்லும் ட்ராலியில் வரிசை படுத்தி வைத்துக் கொண்டாள் பிரபா.

   "குட்மார்னிங் டாக்டர்" "குட்மார்னிங்,  சிஸ்டர் இவருக்கு ஏகப்பட்ட காயம் இருக்கு, சம் நீட்ஸ்  வெல் கிளீனிங்க் ( -சில காயங்கள் நன்றாக சுத்தப் படுத்தப் படவேணும் ) அதான் உங்களைக் கூப்டேன், ப்ளீஸ்" எனறவுடன் "ஒகே டாக்டர்.." என சொல்லிவிட்டு அவர் கைகாட்டிய இளைஞனை உடன் வர சைகை காட்டிவிட்டு அடுத்த அறைக்குள் நுழைந்த கண்மணி ஸ்டூல் ஒன்றைக் காட்டி "இங்கே உக்காரு"என உட்கார்ந்தான் அவன். சுத்தப்படுத்தத் தேவையானவை வைக்கப்பட்டிருந்த ட்ரேயை எடுத்துக்கொண்டு இளைஞனிடம் வந்த கண்மணி "சட்டையை முழுசா கழட்டு" என்றதும் பொத்தான்களை மட்டும் அவிழ்த்திருந்த அவன் முழு சட்டையையும் கழட்ட, முன்னும் பின்னுமாய் முதலுதவி செய்யப்பட்ட ஏகப்பட்ட கீறல்கள் இருக்க "என்னய்யா என்ன ஆச்சு? யார் மருந்து தடவினாங்க.. ம்? ..சொல்லு.." என கேட்க "ஆரம்ப சுகாதார மைய சிஸ்டர்தான் போட்டாங்க, அவங்கதான் பெரியாஸ்பத்திரி போ ன்னாங்க.." என்றதும் "எப்படி வந்துது காயம்..ம்.." "ஏற்கனவே டாக்டர் கிட்ட  சொல்லிட்டேன்ங்களே" என்றவனிடம் "ஏன் எங்ககிட்டே சொல்ல மாட்டீங்களோ.. ஒன்னு விடாம விவரமா சொல்லு.." ஏன்றவுடன் அவன் நடந்ததை சொல்ல ஆரம்பிக்க சிறு காயங்களை சுத்தப்படுத்த, மருந்து பட்டதும் சுளீரென எரிய நெளிந்தான். "..ம் சொல்லு..சொல்லு.." என அவனது கவனத்தை திசை திருப்பிய கண்மணி,  சொல்வதில் அவனுக்கு கவனம் போனதும் ஆழமான காயங்களை சுத்தம் செய்து முடிக்க, அவனும் சொல்லி முடித்தான். "ம்..வேடிக்கையான ஆள்தான் யா நீ,  உன் பேர் என்ன சொன்னே.." "சந்நியாசி", "..ம், சந்நியாசி...அந்த கவுன்ட்டர்ல போய் சீட்ட காட்டி மருந்தை வாங்கிக்கோ போ"  என்றனுப்பினார்.

   " ...சுத்தம் பண்ணனும்,பேழனட் கூட இருக்றவங்க எல்லாம்  கொஞ்சம் வெளில போங்க... டாக்டர் வந்துபோற நேரம் வரை வெளில இருங்க...ஏம்மா நீங்க யாரு? அவங்க  ஜோய்ஸுக்கு சொந்தமா? பக்கத்தில இருக்கீங்க, " என பிரபா கேட்க அப்பெண் "இல்லம்மா...
அங்க ஆம்பளைங்க வாடுல எம் புருசன் இருக்காரும்மா... பாத்துக்க யாருமில்ல மா அதான் இங்கே தரைல படுத்திருந்தேன்" என்றதும் "அப்டிலாம் இங்க வரகூடாது டாக்டருக்கு தெரிஞ்சா நாங்க பாட்டு வாங்கனும், போங்க வெளில போய் பின் பக்கத்தில் நின்னுகுங்க..நான் ஏதோ ஜோய்ஸோட சொந்தம் ன்னுல நெனச்சிட்டேன்..போங்க வெளில போய் இருங்க"என விரட்டினாள்.

   நோயாளிகளின் படுக்கை விரிப்புகளை  உதறி சுத்தம் செய்து படுக்கைகளை சரி செய்துவிட்டு அறைக்குத் திரும்பிய பிரபா,
'டாக்டர் ரவுண்ட்ஸ் முடிஞ்சப்றம் அந்த பேழன்ட் ஜோய்ஸு க்கு நாமே ரொட்டி, பால் ஊட்டி விட்டுடனும், ரொம்ப பாவம், யாருக்குமே இப்படி ஆகக் கூடாது. ஒரு ஜில்லாவுக்கே கலக்டரா இருந்து நெறைய சேவை பண்ணினதா சொல்றாங்க, அப்ப அந்த புண்ணியமெலாம் எங்க போச்சு?' எனத் தனக்குள்ளே வினவிக் கொண்டாள். தன் கைப்பையிலிருந்த செல்போனை எடுத்து கூகுளில் கேன்சர் பற்றித் தேடினாள்.

   ஆஸ்பத்ரியின் நடைபாதையின் ஒருபுறம் வார்டுகளும் மறுபுறத்தில் செவிலியர் அறைகளும் இருப்பதால் அவ்வப்போது நோயாளிகளோடு உடன் இருப்போர் வந்து நோயாளிக்கு 'இப்படி இருக்கு, அப்படி இருக்கு உடனே வாங்களேன்' என்பது பழக்கம் என்பதால் அறை வாசலில் யாரோ வந்திருப்பதாய் தெரிய "என்னாச்சு... யாருக்கு என்ன..." என்றவாறே திரும்பிய பிரபா அங்கே தான் விரட்டிய பெண் நிற்பது பார்த்து "நீங்க ஏன் இங்க நிக்கறீங்க" என கேட்க "ராத்திரிலேர்ந்து எதும் சாப்டுல மா.. டாக்டர் போனதும் ரெண்டே ரெண்டு துண்டு ரொட்டி தாங்களேன் சிஸ்டர்.. உங்களுக்கு புண்ணியமா போகும்" என்று அப்பெண் கைகூப்ப பிரபாவின் தொண்டையடைத்து பேச்சே வரவில்லை. திரும்பித் தனது கைப்பையை திறந்து சாப்பாடு டப்பாவை எடுத்து அப்பெண்ணிடம் கொடுத்து "இந்தாங்க இதில தயிர்சாதம் இருக்கு எடுத்துகிட்டு போய் சாப்டுங்க பின்னாடி மரத்தடி கிட்ட போய் சாப்டுங்க" என்று கொடுக்க, டப்பாவை வாங்கிக் கொண்ட அப்பெண் "நல்லாருக்கனும் மா நீங்க"என்று சொல்லி வேகமாய் நடந்தாள்.

   கூகுளுக்குள் மீண்டும் போக மனமில்லாமல் அறைவாசலையே குத்திட்டு பார்த்தவளாய் இருந்தாள் பிரபா.
"ஏய் பிரபா என்னடி பண்ணே...
இன்னைக்கும் உன் சாப்பாட்டை தானம் பண்ணிட்டியா..உன் டப்பாவை அந்தம்மா எடுத்துட்டு போவுது" என்று அறையினுள் நுழைந்தபடியே கண்மணி கேட்டதும் "போவட்டும் சிஸ்டர்...நான் கடையிலே வாங்கி சாப்டுக்கறேன்" என்றதற்கு "அடியேய்..பொண்ணு வீட்டுக்கு போறேன் கடை இன்னைக்கு லீவுன்னு நேத்து ராமு சொன்னதை மறந்துட்டியா" என்றதும் "விடுங்க சிஸ்டர் டவுனுக்குள்ள போய் சாப்டுக்கலாம்" என்றாள் பிரபா.

  "என்னமோ போ.. சாப்டாம கெடந்து அந்த ஜோய்ஸ் மாதிரி உனக்கும் கேன்சர் தான் வரப் போகுது...." என்றதும், "ஏன் சிஸ்டர்
அவங்களுக்கு  வீட்ல யாரும் இல்லயா?சொந்தம்ன்னு கூட யாருமே இல்லயா, ஜிப்மர், அடையாறு ன்னு பெரிய ஆஸ்பத்ரில காட்டி பாக்கலாம்ல.." என்றதும் "இவங்களையே 4, 5 நாளா ஆள் வெளியிலேயே வரலைன்னு அக்கம் பக்கத்தில் இருக்றவங்க போலீசுக்கு சொல்லி கதவை உடச்சு மீட்டு வந்து இங்க சேர்த்திருக்கு, செல்போன்ல இருந்ததை வச்சி தங்கச்சி ஒன்னு கேரளாவுல இருக்குன்னு கண்டுபிடிச்சு தகவல் சொல்லி இருக்காங்க, இன்னைக்கோ நாளைக்கோ வரலாம். மருந்து சாப்டாம, சாப்பாடே இல்லாமல் பல நாள் கிடந்திருக்கு இந்தம்மா உழா ஜோய்ஸ். இதுக்குதான், ஒரு கல்யாணம் ன்னு ஆகிப் புருசன், புள்ள குட்டின்னு யாராவது இருந்திருந்தால் இப்படி இந்த நிலை வந்திருக்காதில்ல. நீயும் அடம் புடிக்காம கல்யாணம் பண்ணிக்கோடீ, 39 வயசு ஆனா என்ன உன் சம்பளத்துக்கு யாராவது நல்லவனா கிடைப்பான், வர்ற புருசனும் நீயுமா சேர்ந்து உன் அப்பாரை பார்த்துக்கலாம் ஸ்பின்ஸீ...சொன்னா கேளு" என்றதும் " கல்யாணம் பண்ணி ஒருத்தருக்கு, ஒரு குடும்பத்துக்கு சேவை செய்றதில வரும் நிம்மதியை விட பலருக்கு செய்றதுல நிம்மதி அதிகம் அக்கா, அதுவுமில்லாம பேச்சுவாக்கில நீங்களே பதில் சொல்லிட்டீங்க...நான் ஒரு ஸ்பின்ஸ்டர் -கன்னிப் பெண் ங்றதை சுருக்கி ஸ்பின்ஸீ ன்னு கூப்டீங்கல்ல அதான் பதில், பண வசதி உள்ள மாமனாரையேக் கூட கூடவச்சிகிட மாட்டாங்க , இதிலே கைகால் விளங்காத எங்கப்பாரை யார் கூட இருக்க விடுவாங்க அக்கா, உழா ஜோய்ஸ் மாதிரி இல்லாமல் நானே என்னையும்  பார்த்துப்பேன் அக்கா, நீங்க கவலப்படாதீங்க, ரவுண்ட்ஸ் வர்ற நேரம் ஆகுது அதுக்குள்ள நான் போய் ஜோய்ஸுக்கு முகத்தை துடைச்சி தலை ஒதுக்கிட்டு ஓடியாரேன்" என்று வேகமாய் போனாள் பிரபா.

   'இவளை மாத்தவே முடியாது போல' என்றெண்ணியபடி கண்மணி உட்கார "சிஸ்டர்.." என்றவாறு மீண்டும் வார்டு பாய் வந்து நிற்பதை பார்த்து "என்ன....டாக்டர் திரும்பவும் கூப்டறாரா...." எனக் கேட்க "இல்ல சிஸ்டர்... ஒரு 1000 ரூபாய் இருந்தால் குடுங்களேன்... பையன் பிறந்தநாள் வருது..அதான்..." என இழுக்க "யப்பா..  பேருக்கு தான்டா எனக்கு சம்பளம் அதிகம் , ஆனா, மாசம் பாதியாச்சுன்னா ஈஎம்ஐங்களை கட்டியே  பர்ஸ் காலி டா, இப்ப உனக்கு உதவக் கூடிய ஒரே ஆள் அவதான்.. ஸ்பின்ஸீ.." முதிர்கன்னி பிரபாவைக் காட்டினார் கண்மணி.

                                -முற்றும்-